Para Sa Prinsesa Ng Pamilya

Dear Kapatid,

          Parang kalian lang ang laki-laki mo na. tandang tanda ko nung una kitang makita sa hospital hinalikan kaagad kita sa paa, kahit na amoy sinapupunan ka pa lang noon, tuwang tuwa ako kasi sa wakas may kapatid na ako. Salamat sa Diyos kasi lumaki ka ng maganda, maraming mga pinsan naten ang nagkaroon ng kaunting pag-asa na gaganda pa ang maliliit nilang anak at sasabihing “bakit nga si Madet, ampanget nyan nung bata”

          Sinong hindi makakalimot sa nakakatawang kwento ni mama na kapag dadalin ka daw nya sa center para sa libreng bakuna ay tuwing uwian na at paalis na ang mga tao, kasi nga ang itim-itim mo noon. Dati pa nga dahil hindi ka naman nasanay dumede sa bote, nabuhay ka sa breast feed, kapag daw sumasakay na kayo sa jeep itatago ka na nya sa damit nya para hindi ka na mapintasan ng mga tao, baka daw kasi sabihin “ang ganda ganda ng ale, ampanget naman ng anak”. Hala naman kasi, bakit nga ba ganon ang itsura mo noon. Pero syempre alam naman nating lahat na biro lang ni mama yon, at yon ay noon pa, noong bata ka pa.
          Tandang tanda ko din noong maliliit pa tayo, ribrib ang ngipin mo, maitim ka pa din at medyo may kalakihan ang mga mata. Madalas kaaway kita sa lahat lalo na sa remote ng TV. Kapag hindi ko yon nakukuha sayo pinapalo kita sa balikat, tapos bigla ka na lang aatungal, isusumbong mo ako kay lolo at sasabihin mo kinabog kita. Si lolo naman tapos na ang lahat ng cartoons hindi pa din ako tapos sermunan, ikaw naman titingin pa saken ng nakadila.
          Ambilis ng panahon hindi ko namalayan, ilang araw na lang pala ganap ka ng dalaga. Pasensya ka na kung madalas kinukulang ang baon mo, pasensya ka na hindi ka nabuhay ng may kasamang luho, alam mo naman hindi tayo mayaman at hindi rin biro ang gastusin ng kurso mo, pero nakita mo, basta humiling ka ng mga pambayad sa iskwela gumagawa kami ng paraan kahit na hindi na alam nila mama at dade kung saan pa mangungutang. Pagbutihin mo ang pag-aaral, para naman sayo yan, malaki ang tiwala naming sayo kaya malaki ang pag-asa namin na makakatapos ka.
Sabi ko naman sayo hindi bawal magboyfriend, basta tandaan mo may mga limitasyon, at may mga bagay na mas dapat pag ukulan ng pansin ng higit pa doon.
          Ipaghahanda ka naman talaga namin, di ba nga matagal ng plano yon, pero dahil nagduduty ka na, magkaoras ka man, bisita mo naman at mga kaklase ang malamang sa hindi makapunta. Buti na lang, nakatipid na naman ang kuya mo.
          Mag-ingat ka lagi, alam mo namang ikaw lang ang prinsesa ng pamilya naten, lagi mong tatandaan mahal na mahal kita, mahal na mahal ka namen.

HAPPY 18th BIRTHDAY KAPATID

Love,

Kuya

P.S

Habang sinusulat ko to iyak ako ng iyak, kasi bumabalik yung batang madet na parang naghahanap ng kuya na magtatanggol sa kanya. Sorry Madet ha palagi tayong nagaaway noon, kaya walang masyadong magandang alaala ang ating kabataan. Pero kita mo naman nagbago na ako at alam mo din naman siguro na away magkapatid lang yoon, away bata, at hindi pangmatagalan.

“Promise from now on, I will be your best kuya ever”